Kuri uyu wa gatanu taliki ya 4 Werurwe, 2022, nk'uko byari biteganyijwe, muri IPRC KITABI habereye umuhango wo gukura intore ku karubanda, aho izi intore zari zimaze iminsi itanu zitorezwa mu gicumbi cy'umuco cya IPRC KITABI.
                      Intore zerekeza ku marembo kugirango zinjizwe mu zindi/Photo by Jimmy NSENGIMANA

Umutoza mukuru akaba n'umuyobozi w'akarere ka Nyamagabe ni we wakiriye izi ntore, azinjiza mu zindi, aziha izina ndetse n'icyivugo.
Ziswe: "INTAGAMBURUZWA."

Uyu muhango ukaba witabiriwe n'umuyobozi w'iri shuri akaba n'umutoza mukuru waryo Bwana NASASIRA Richard, aho yarari kumwe n'abashyitsi batandukanye barimo umuyobozi akaba n'umutoza mukuru w'akarere ka Nyamagabe Bwana NIYOMWUNGERI Hildebrand, abahagarariye inzego z'umutekano ndetse n'abandi batandukanye.

Umuyobozi akaba n'umutoza mukuru muri IPRC KITABI Bwana NASASIRA, akaba yasabye izi ntore kurangwa n'ubufatanye, umurava mu byo bakora byose ndetse n'ikinyabupfura nkuko babitojwe. Yongeyeho ko abitezeho inkunga ikomeye mu gukomeza guteza imbere IPRC KITABI nk'amaraso mashya. Umuyobozi akaba yasoje ashimira izi ntore kuba zarahisemo kwiga muri IPRC Kitabi.

Naho umuyobozi w'akarere ka Nyamagabe we yagize ati:
"Ndabasaba kubyaza umusaruro amahirwe mufite nk'urubyiruko kandi rujijutse, no gukomeza uruhare rwanyu mu kubaka u Rwanda kuko ari mwe ejo heza h'iki gihugu."

Izi ntore z'Intagamburuzwa zikaba zahize imihigo y'ibyo zizakora muri uyu mwaka w'amasomo wa 2021-2022.
Zikaba zaratojwe bikozwe mu buryo butandukanye harimo: imyitozo ngororamubiri, imikorongiro, ibiganiro byagiye bitangwa n'abatoza batandukanye, indirimbo z'umuco w'u Rwanda, intambwe y'intore n'andi masomo y'uruhererekane azakomeza no mu bihe bisanzwe.