Uyu munsi ku wa 17 Kamena, 2022, muri IPRC KITABI habereye igikorwa cyo kwibuka ku nshuro ya 28 Jenoside yakorewe Abatutsi mu 1994 ku rwego rw’ishuri.

                                 Abakozi n'abanyeshuri ba IPRC Kitabi bauye urwibutso rwa Murambi/Photo by Jimmy
Uyu muhango ukaba wabimburiwe no gusura urwibutso rwa Jenoside rwa Murambi, ruherereye mu karere ka Nyamagabe ku ruhande rw'abayobozi, abakozi, abanyeshuri bagize umuryango wa AERG ICYIZERE/IPRC KITABI ndetse n'abanyeshuri bayobora abandi (Guild Council).

Mu rwego kandi rwo kurushaho kwitegura neza iki gikorwa, muri iki cyumweru dusoza, ubuyobozi bwa IPRC KITABI bwashyiriyeho abanyeshuri bose uburyo bwo gusura urwibutso rwa Jenoside rwa Murambi, kugirango nk'urubyiruko barusheho kumenya amateka ya Jenoside yakorewe Abatutsi mu 1994, ndetse banibonere amaso ku maso bimwe mu bimenyetso byayo.

Nyuma yaho ubuyobozi, abakozi, abanyeshuri bahagarariye abandi n'abanyeshuri babarizwa mu muryango wa AERG ICYIZERE/IPRC kitabi bamaze gusura urwibutso rwa Murambi, bahise bagaruka ahari hateganyijwe kubera umuhango nyirizina wo kwibuka.

                              Umuyobozi mukuru w'ishuri n'uwumwungirije bacana urumuri rw'icyizere/Photo by Jimmy
Umuhango nyirizina, ukaba witabiriwe n’abashyitsi batandukanye barimo abarokokeye mu murenge wa Kitabi, witabiriwe kandi n’abakozi n’abanyeshuri ba IPRC Kitabi.

Mugabo Fred wiga mu mwaka wa kabiri ishami ry’ubukeraragundo yavuze ko gukomeza kuvuga amateka ya jenoside yakorewe abatutsi mu 1994 yabaye mu Rwanda nta kuyagoreka, kuko ari inzira nziza zo kuyirwanya ntizongere kubaho ukundi.

Mugabo yagize ati: “Tugomba kuba maso twese, hagakumirwa uwari wese waza guca ibice mu banyarwanda, yaboneka twese tugahaguruka tukamurwanya, by’umwihariko twebwe urubyiruko.”

Uwineza Joselyne wiga ibijyanye n’amashyamba mu mwaka wa kabiri na we yagize ati: “Tugomba gukumira abantu bapfobya jenoside ndetse bakayihakana twifashishije ibimenyetso byayo n’amateka y’ukuri nk’uko bimwe twanabyiboneye ubwo twasuraga urwibutso rwa Jenoside rwa Murambi.”

Naho umuyobozi w'ishuri Bwana NASASIRA Richard we yibukije abanyeshuri ko nk’urubyiruko ari bo Rwanda rw'ejo, kandi ko bagomba kurwanya uwo ari we wese wifuriza u Rwanda gusubira aho rwavuye, by’umwihariko bagasenyera umugozi umwe nka Benekanyarwanda.

Yagize ati: “Imikorere mibi yiganjemo ubuswa, ubugome, irondabwoko byaranze ubuyobozi bwari buriho mu gihe jenoside yakorewe abatutsi 1994 yategurwaga ikanashyirwa mu bikorwa mubyirinde, murwanye uwo ari we wese washaka kubayobya, ahubwo musenyere umugozi umwe n’ubundi turi umwe.”

Jenoside yakorewe Abatutsi mu 1994, yatwaye ubuzima bw'inzirakarengane z'Abatutsi zazize uko zavutse zirenga 1,000,000.